Қазақстанның Бюджет кодексіне сәйкес, әрбір деңгейдегі бюджет дербес болуы керек. Бұл жергілікті биліктің қаржылық шешімдері үшін жауапкершілігін қамтамасыз етеді. Алайда, сенатор Нұғмановтың айтуынша, іс жүзінде бұл қағида жиі бұзылады. Ең алаңдатарлық жайттардың бірі – орталық органдар тарапынан жергілікті бюджеттердің қаржысы есебінен жергілікті мекемелер үшін ғимараттар салу, күрделі жөндеу жүргізу немесе қызметтік көлік сатып алу сияқты шығындарды қаржыландыру. Мұндай тәжірибе бюджет қаражатын мақсатсыз пайдалануға және жергілікті бюджеттерге қосымша қаржылық жүктеме тудыруға әкеледі.
«Еліміздің ірі ұлттық компанияларының жыл сайын өздеріне меншікті өңірдегі ғимараттарын жергілікті бюджет есебінен ірі жөндеуден өткізіп, кейіннен қайтадан өз балансына қайтарып алу әрекеттерін жиі қолдануда. Мұндай іс-әрекеттер бюджеттің тиімді пайдаланылуына, жергілікті қаржылық теңгерімге кері әсерін тигізіп отыр. Осы мәселелерді жүйелі түрде шешу және ретке келтіру үшін бірқатар шаралар қабылдануы қажет. Бұл шаралардың басты мақсаты жергілікті бюджеттің дербестігін қамтамасыз ету және оның ашықтығын арттыру болуы тиіс», – деп атап өтті сенатор Амангелді Нұғманов.
Сенатордың пікірінше, жергілікті маңызы бар нысандарды тапсыру процестеріне бақылауды күшейту және бюджет тәртібін бұзғаны үшін жауапкершілікті қатаңдату қажет. Мемлекеттік органдар арасында нысандарды жиі беру жағдайында міндетті аудит жүргізіп, мұндай жағдайлардың алдын алу үшін шаралар қабылдау керек.
Фото:BaigeNews.kz
