Жаңа мектепте оқушылардың сапалы білім алуы үшін барлық жағдай жасалған. Ғимаратта кең әрі жарық оқу кабинеттері, спорт және мәжіліс залдары, кітапхана, пәндік сыныптар, асхана мен демалыс аймақтары бар. Сонымен қатар, мектептің қауіпсіздігін қамтамасыз ету мақсатында бейнебақылау камералары мен өрт қауіпсіздік жүйесі орнатылған. Оқушылардың спортпен айналысуы үшін ашық спорт алаңдары да бар.
Ал, Сайрам ауданы әкімінің орынбасары Мадияр Оразалиев Қарасу ауылындағы 57 га аумақтағы 5 қабатты тұрғын үйлерді салуға ниет білдірген жеке инвесторлармен кездесті.
Жиынға аудандық мемлекеттік органдар мен дербес бөлім басшылары және ауылдық округ әкімдері қатысты. Мадияр Мұхтарұлы өз сөзінде Сайрам ауданының инвестициялық әлеуетіне тоқталып, бүгінгі жоба назардан тыс қалмайтынын және қолдау көрсетілетінін айтты.
Кеңейтілген мәжілісте аудандық құрылыс, сәулет және қала құрылысы бөлімінің басшысы Алибжан Ибрагимов Қарасу ауылындағы 57 га аумақта салынатын құрылыс нысандарына қатысты жоспарларымен бөлісті.
Атап айтқанда, бес қабатты 49 дана тұрғын үй, 280 орындық балабақша, 1200 орындық мектеп, 250 орындық емхана, мәдениет үйі мен «Жастар» сарайы, мешіт бой көтеретінін баяндады. Сондай-ақ, нысандардың инфрақұрылым жүйелерін 2025-2026 жылдары жүзеге асыру жоспарланғанын жеткізді.
Басқосу барысында қос тарап аталмыш жобаны жүзеге асыру барысында атқарылатын жұмыстар мен басты міндеттерді талқылады. Жеке инвесторлар өз кезегінде құрылыс жұмыстарына қатысты жауапкершіліктер бойынша бірлесе жұмыс істеуге оң көзқарастарын білдірді.
Ата-бабамыз қайырымдылық жасау арқылы ауызбіршілікті, адалдықты, ынтымақты ту етіп көтерген. Әсіресе, көптің мәселесін қара бастың қамынан жоғары қойған. «Қайыр бар жерде ырыс бар» деген қайырымдылық жасау арқылы кәсіптерін кеңейтіп, табыстарын тасқындатып жатқандар жетерлік. Яғни, қайырымдылық ісі күн сайын жалғасып жатыр.
Сондай-ақ, Түркістан облысы әкімдігінің ұйымдастыруымен Төлеби ауданында тұрмыс жағдайы төмен, көпбалалы отбасыдан шыққан, жетім, мүмкіндігі шектеулі, жартылай жетім оқушылар мен қатар жалғызілікті қарияларға әлеуметтік көмек көрсетілуде.
Жақсылыққа жаны құмар демеушілер, меценаттар жалғыз басты қарттар мен пробация қызметі есебінде тұрғын отбасы балаларының қыста тоңбауын ойластырып, оларға өз қаражаты есебінен киім-кешектер үлестіріп берді. Жылы күртеше, бас киім, етік, қолғап пен шұлыққа дейін алған балақайлар мен қарттар көмек көрсеткен жомарт жандарға ризашылықтарын білдірді. Көмекке мұқтаж отбасында тәрбиеленіп отырған балалар, жалғызілікті қариялар өз сұраныстарына сай, қысқы киіммен қамтылды. Барлығы 29 отбасыға көмек көрсетілді.
Өскелең ұрпақтың үйлесімді дамуы мен бақытты балалық шағы – біздің жалпыұлттық міндетіміз, сондықтан, аудан аумағында қайырымдылық акциясы жыл көлемінде жалғасын табады.
Білім мен ғылым саласын дамытуда ел жастарына үлкен қамқорлықтар мен мол мүмкіндіктер жасалып жатыр. Өйткені, елдің болашағы бүгінгі жастардың қолында. Бәсекеге қабілетті, білімді, кез-келген елмен иық тіресе алатын деңгейге жетулері үшін олардың білім алатын мектептерінің заманауи болуы да үлкен маңызға ие.
Жетісай ауданына арнайы іссапармен келген «KEMELDEN GROUP» ЖШС басшысы Берік Қасымбековты қабылдаған Жетісай ауданының әкімі Серік Мамытов отандық ғылыми-техникалық даму, оқушыларға жаратылыстану-математика пәндері мен ағылшын тілін оқытудың маңыздылығы, ұрпақ мүддесі үшін оқу-ағарту саласының популистік санадан арылып, балалардың мүддесін қорғауға тиіс екендігі, жеке инвестициялар есебінен заманауи мектептердің санын арттыру мәселелерін кеңінен талқылады.
Екіжақты жүргізілген алдын ала келіссөздердің нәтижесінде «KEMELDEN GROUP» ЖШС басшысы Берік Қасымбеков 2025-2026 жылдары аудан аумағынан 1000 оқушыға арналған 2 мектеп салуға, нақтырағы, Ш.Ділдәбеков ауылдық округінің Қызылтаң елді мекенінен жалпы аумағы 2 га жерге 500 орындық, Қызылқұм ауылдық округінің Қызылқұм елді мекенінен жалпы аумағы 2 га жерге 500 орындық заманауи мектептің құрылысын жүргізетін болды.
Одан бөлек, «OLZHA SMART» ЖШС Жаңа ауыл ауылдық округінің Мырзашөл елді мекенінен жалпы аумағы 1,6 га жерге 320 оқушыға арналған мектеп салынады деп жоспарлануда.
Айта кетейік, биыл жеке инвестиция есебінен Жетісай қаласынан «ЕРЖИГИТ» ЖШС 420 орындық, «ЛИДЕР» ЖШС 300 орындық 2 мектепті іске қосқан.
