Жол жөндеу жұмыстарының сапасын қамтамасыз ету үшін, Автомобиль жолдары Комитетінің қарамағындағы «Жол активтері ұлттық сапа орталығына» жергілікті бюджеттен 195,8 млн. теңге бөлінген. Сапа орталығымен 400 жерге шығып зерделеу жұмыстары жүргізіліп, 2000 сынама алынды.
Кемшіліктерді жою барысында 24,4 млн. теңге құрайтын сапасыз салынған 5 800 шаршы метр асфальтбетон жамылғысы мердігерлер есебінен қайта салынды. Сонымен қатар сапасыз жол құрылыс материалдарының қолданылуы немесе келісім-шарт талаптарының бұзылуына жол берген мердігерлерге жалпы 39,0 млн. теңге тұрақсыздық айыппұлдары салынып, 1 мердігер жосықсыз ретінде танылды. 6 мердігерді /Мойынкум – 1, Кордай – 1, Талас – 2, Тараз – 2/ жосықсыз деп тану бойынша сот процестері жүруде.
Жалпы алғанда сапаға өндіріс жұмыстарын жүргізу технологиясының сақталмауы және нысандарда техникалық қадағалаушылармен жүргізіліп жатқан қадағалау жұмыстарының деңгейі тікелей әсер еткен. Бұл ретте, өткен жылы, мердігерлерден бөлек осындай кемшіліктер мен бұзушылықтарға жол берген тапсырыс берушілер болып табылатын жауапты жергілікті атқарушы органдар, атап айтқанда, 9 ауылдық округтің әкімдері тәртіптік жауапкершілікке тартылса, 7 тұлға – оның ішінде 6 — ауыл әкімдері мен 1 — ЖКХ бөлімінің басшысына Әдеп жөніндегі кеңестің шешімімен қызметіне «толық сәйкес емес» түріндегі тәртіптік жаза қолданылды.
Автожолдардың мерзімінен бұрын бұзылуынан сақтап қалу мақсатында, Көліктік бақылау Инспекциясының аумақтық бөлімі өкілдерімен бірлесіп облыс жолдарында рейдттер ұйымдастырылып, тексерулер жүргізу шаралары жалғасуда.
Бұл ретте, 2024 жылдың 11 айында жылжымалы көліктік бақылау посттарында 1778 әкімшілік хаттамалар толтырылып, 96,8 млн теңгеге айыппұл салынып, жергілікті бюджетке 88,7 млн. теңге өндірілді.
Фото: Егемен Қазақстан
