Жобаға сәйкес Ақсу ауылында Ж. Баласағұн атындағы орта мектебі, Бірлік ауылындағы М.Х. Дулати атындағы орта мектебі, Д. Қонаев ауылындағы «Бәйтерек» балабақшасы, Белбасар ауылының Ш. Уалиханов атындағы орта мектебі, Бірлікүстем ауылындағы «Жұлдыз» балабақшасы, Жаңажол ауылындағы Б. Момышұлы атындағы орта мектебі және Жаңажол ауылының «Бәйшешек» балабақшасы қазандықтары табиғи газға ауыстырылып, нысандар пайдалануға берілді.
— Алайда, өткен жылы Шу ауданы бойынша қолданыстағы газдың қысымы төмен болу жағдайы орын алуына байланысты аталған нысандар газ жүйесіне уақытша қосыла алмады, — дейді Жамбыл облысының энергетика және тұрғын үй-коммуналдық шаруашылық басқармасы Ғалым Исақов. — Дегенмен, мектеп қазандықтары резервтік көмір және дизель отындарымен тұрақты жұмыс істеп шықты.
Нақтырақ айтар болсақ, Шу ауданы «Қордай» автоматты газ тарату станциясы (АГТС) арқылы газбен жабдықталған. Жалпы қуаты 12 кгс/см2 болса, қыс маусымы кезеңінде Шу қаласында газдың қысымы 4,5 кгс/см2 дейін, Бірлік, Көктөбе ауылдарында 0,8 кгс/см2 дейін төмендеп кеткен.
Бұл проблемадан қалай құтылуға болады?
Қазір «Qazaq Gaz Aimaq» АҚ филиалымен бірлесе газдың қысымын ұлғайту мәселелері зерделеніп, қыс маусымы кезеңінде коммерциялық, өндірістік мекемелерде баламалы отын түрін пайдалану арқылы газдың тұтыну деңгейін төмендету арқылы газдың қысымын ұлғайту шаралары қарастырылуда.
«Бұл мәселені толық шешу үшін қазіргі таңда салынып жатқан «Шу» автоматты газ тарату станциясы (АГТС) құрылысын аяқтау қажет. Бұл жұмыстар ҚР Үкіметі резервінен қаржы қарастырылған жағдайда, келесі жылы шешімін таппақ» дейді басқарма басшысы Ғалым Исақов.
Естеріңізге сала кетейік, Жамбыл облыстық мәслихаты «Жамбыл облысында «Ауыл аманаты» жобасының жүзеге асырылу барысы» және ««Ауыл – Ел бесігі» жобасы шеңберінде ауылдық елді мекендерде әлеуметтік және инженерлік инфрақұрылымдарды дамыту, ауыл халқының әлеуметтік игіліктер мен мемлекеттік қызметтерге қолжетімділігін қамтамасыз ету барысы туралы» мәселелерді қараған болатын.
