Жамбыл облысындағы 42 техникалық және кәсіптік білім беру ұйымында 28 219 студент білім алуда. Бұл оқу орындарының 20-сы мемлекеттік, 22-сі мемлекеттік емес колледждер. Осы оқу орындарын тәмамдаған 7 248 түлек биыл еңбек нарығына аттанғалы отыр. Олардың ішінде 3 880 студент мемлекеттік тапсырыспен білім алған.
Жалпы алғанда өткен жылы маман даярлауға грант көлемі 7 486 орын болса, биыл 7 656 орынға грант бөлінді. 2024 жылы қыркүйек айынан бастап студенттердің шәкіртақысы 2 есеге өсті, 43 574 теңге болды. Мемлекеттік тапсырыс шеңберінде білім алатын 1 019 студент жатақханамен, 7 571 студент ыстық тамақпен қамтылып, 6 мыңға жуығына жол шығындарын өтеу бойынша әлеуметтік қолдау тұрақты көрсетіліп келеді. Бұл өз кезегінде жастар арасында жұмысшы мамандықтарға түсуге ниет білдірушілердің қатарын арттыруға ықпал еткені анық.
Жамбыл облысында инвестициялық жобалар қарқынды дамып, ауқымы бойынша республикада алғашқы орындамыз. Бұл өз кезегінде техникалық және кәсіптік білімде үлкен трасформациялық жұмыстарды талап етеді. Осыларға кадр әзірлеуде колледждер дайын болу қажет. Сондықтан 2025-2027 жылдары металлургия саласындағы инвестициялық жоба «Yonggang Iron and Steel Group Co.,Ltd» жауапкершілігі шектеулі серіктестігінде 1000 жұмыс орны, «Investment Co., Ltd. Fufeng Group Ltd» жүгері өңдеу зауытында 500 жұмыс орны ашылады деп күтілуде.
Осындай инвест жобаларға сапалы кадр дайындау мақсатында облыста шетелдік колледждің филиалын ашу жөнінде Қытай мемлекетінің Сиянь қаласындағы кәсіптік білім беру комитетімен Жамбыл облыстық білім басқармасы арасында келісімге қол қойылды. Жамбыл облыстық білім басқармасының басшысы Нұрбек Оршыбековтың айтуына қарағанда ірі кәсіпорындардың базасында өндірістік дуалдық оқытудан өту, түлектерді өз мамандықтарымен жұмысқа орналастыру, ірі өндірістермен салалық кластерлер құру, серіктес кәсіпорындарында оқудан, тағылымдамадан өту жұмыстары да басталды. Енді бұл бағыттағы жұмыстар жалғаса береді.
Фото: Мақат тынысы
