Астанада заң білімінің сапасын арттыру және одан әрі дамыту мәселелері жөнінде өткен ғылыми-практикалық конференцияда баяндама жасаған ҚР Парламенті Сенаты Конституциялық заңнама, сот жүйесі және құқық қорғау органдары комитетінің төрағасы Нұрлан Бекназаров осындай мәліметтер келтірді.
— Бұл аса мән беретін мәселе, — дейді сенатор Нұрлан Бекназаров. — Мысалы, Германияда 84 миллион тұрғынға шаққанда 40-қа жуық қана заңгерлік оқу орындары қызмет етуде. Сенат депутаттары осы мәселеге ерекше назар аударып келеді, бірқатар іс-шаралар да өткізілуде. Жуырда осы мәселе Бас прокуратура жанындағы құқық қорғау органдары Академиясында бірлесіп талқыланды. Мысал ретінде: Академияның өзінде соңғы қабылдау науқаны кезінде жоғарғы оқу орындарының түлектері болып табылатын 552 үміткердің 329-ы әрең дегенде қанағаттанарлық бағасын, ал 98-і тіптен емтихан тапсыра алмаған.
Шынында соңғы жылдары жоғары заңгерлік білім алу саласы сынға ұшырауда. Сот және құқық қорғау жүйелерін реформалау, сондай-ақ ұлттық заңнаманы дамыту жағдайында елімізге заманауи талаптарға сәйкес келетін білікті заңгерлер қажет. Ресми ақпаратқа сәйкес, бүгінде «Құқық» бағыты бойынша кадрларды даярлайтын жоғары оқу орындарының саны 59-ды құрап отыр.
— Тиісті жоғары оқу орындары санының өсуі азаматтарымыздың жоғары білімге деген сұранысын қанағаттандырғанымен, мамандарды даярлау сапасына теріс әсерін тигізбей қоймады, ол әсіресе кейбір жекеменшік жоғары оқу орындарына қатысты. Тағы бір көңіл аударатын мәселе, ол қоғам мен азаматтардың құқықтық сауаттылық мәдениетін көтеру және заңнамалық өзгерістерге қатысты ақпараттық түсіндіру жұмыстарын жүргізуді күшейту. Сонымен бірге, қолданыстағы заңнаманың нормаларының мәтіндерін қарапайым халыққа түсінікті түрде жазылып, қабылдануы өте маңызды, — дейді Нұрлан Бекназаров.
Конференция барысында Ғылым және жоғары білім министрі Саясат Нұрбек, Жоғарғы Сот жанындағы Сот төрелігі академиясының ректоры Зәуреш Баймолдина, О.Е.Кутафин атындағы Мәскеу мемлекеттік заң университетінің бірінші проректоры Инна Ершова, Ресей ІІМ Волгоград академиясының профессоры О.Б.Дронова, М.С.Нәрікбаев атындағы ҚАЗГЗУ ректоры С.Г.Пен, әл-Фараби ҚазҰУ заң факультетінің деканы Д. Байделдинов және басқалар сөз сөйледі.
